T’i përgjigjemi thirrjes së Zotit për t’i shërbyer

“Thirrja e çdo personi është të jemi shenjtorë. Ne thirremi të bëhemi të shenjtë ashtu si Perëndia është i shenjtë, të jemi të përkryer ashtu si Ati ynë në qiell është i përsosur. (Rom 1:7,1 Cor1:2, Mat 5:48) Ne thirremi të jemi shenjtorë, por gjithësecili prej nesh do ta bëjë këtë në mënyrën e tij/saj. Të gjithë thirremi të marrim pjesë në qenien dhe jetën e Perëndisë… por secili do ta bëjë në mënyrën e tij sipas kushteve dhe mundësive që Perëndia siguron.” – thotë Atë Thomas Hopko.
Fëmijët e kampit ditor në Katedralen Ngjallja kanë patur mundësinë të mësojnë përmes diskutimeve, këngëve, artit, vargjeve biblike, etj. për thirrjen që Zoti ka për ta dhe si t’i përgjigjemi kësaj thirrje për t’i shërbyer Zotit. Për gjithësecilin mënyra se si do t’i shërbejë Zotit do të jetë e ndryshme. Fëmijët kanë patur mundësi të shikojnë shembuj të ndryshëm dhe përgjigje të ndryshme ndaj thirrjes së Zotit. Përgjigja e Shën Marisë “U bëftë sipas dëshirës tënde” e lejoi atë të bëhej pjesë e historisë së shpëtimit. Refuzimi që Jonai i bëri thirrjes së tij për t’u predikuar pendimin Nineveasve e dërgoi atë në Tarshish. Pjetri mohoi thirrjen e tij për të qenë dëshmitar i Krishtit natën në të cilën Mjeshtri u tradhëtua dhe u dorëzua në duart e kryepriftërinjve. Polikarpi në kohën e persekutimeve u thirr të bëhej martir (dëshmitar) i Krishtit. Këto shembuj na bëjnë të reflektojmë cila është përgjigja jonë ndaj thirrjes për t’i shërbyer Zotit. A po përgjigjemi ne pozitivisht ashtu si Shën Maria, apo ashtu si Jonai po i shmangemi thirrjes sonë, apo po ndjekim shembullin e Pjetrit dhe e mohojmë thirrjen tonë e humbasim mundësinë t’i shërbejmë Zotit? Le të reflektojmë për vendimet tonë, t’i lutemi Zotit të na ndihojmë të përmbushim thirrjen tonë dhe të bëhemi ata persona që Perëndia na krijoi të jemi.